Россиядин Яракьлу Къуватра къуллугъзавай лезгийрихъ тIвар-ван авай, чIехи къуллугърал алай пешекарар гзаф ава. Абурукай сад 42 йиса аваз генералвилин чин къачур Хейирбеков Забит Сабиран хва я. 

    З.Хейирбеков 1968-йисуз Азербайжан Республикадин КцӀар шегьерда дидедиз хьана. Аял чӀавалай военный хьун мурад тир ам шегьердин 2-нумрадин урус мектеб акьалтӀарун кумазни вахтундилай вилик аскервилиз рекье гьатна.

    Гуржистанда къуллугъ кьилиз акъудай жегьил 1987-йисуз Рязандин Вини Дережадин Военный Автомобилрин Инженервилин Мектебдик экечӀна. Анаг тафаватлувилелди акьалтӀарай адаз къуллугъдин чка хкядай ихтияр гана. 

    Дагьустан Республикадин Буйнакск шегьерда къуллугъдал акъвазай и жегьилдин алакьунриз регьберри гайи къиметдин нетижа яз адакай лейтенант хьана, къуллугъни чӀехи авуна. Оржоникидзе (гилан Владикавказ) шегьердиз ракъурай З.Хейирбековаз кьве йисалай капитанвилин чин гана. Мадни кьве йис алатайла ада вахтундилай вилик майорвилин чин къачуна. 1999-йисуз вичин къуллугъ мадни чӀехи хьайи Забит подполковниквилин дережадив агакьна.

    Везифадин гурарин кӀарарал ара датӀана хкаж жезвай, вичихъ чӀехи алакьунар авай Забит Хейирбеков 2001-йисуз РФ-дин Яракьлу Къуватрин Военный Академиядик экечӀна. Ина чирвилерин рекьяй виридаз чешне къалурай лезгидиз полковниквилин чин гана. 2003-йисалай Амур вилаятдии Белогорск шегьерда къуллугъай Забит Хейирбековаз 2010-йисуз генерал-майордин чин гана. Адакай армиядин командующийдин заместитель, гьакӀни яракьлу къуватар яракьламишдай штабдин кьил хьана. Гуьгъуьнлай ам гьавадинни-космосдин къуватрин главнокомандующийдин заместителвиле тайинарна.

    Алай йисан 11-июндиз РФ-дин Президент В.В. Путинан серенжемдалди Забит Хейирбековаз генерал-лейтенантвилин чин гана.

 

Азизрин СЕВДА