И йикъара вичиз Къарабагъдин гьавадин варар лугьузвай Фуьзулида вири дуьньядиз талукь тир аэропорт кардик кутуна. ЦIийи аэропорт Азербайжан Рес-

публикадин Президент Илгьам Алиева ва Туьркия Республикадин Президент Режеб Таййиб Эрдогъана ачухарна. Абур ина арадиз гъанвай къулайвилерихъ галаз мукьувай таниш хьана. 

   Куьруь вахтунда – 8 вацран къене эцигнавай аэропортдин лув гудай ва эвичIдай зулунин яргъивал 3000 метр, гьяркьуьвал 60 метр я. Перронди 60 агъзур квадратметрдин чка кьазва ва ина 8 чIехи самолёт гьакьзава. Алай девирдин кIалубрив кьадай инфраструктурадалди таъмин хьанвай терминалди са сятда 200 кас ахъайдай мумкинвал гузва. Вири эцигунар дуьньядин стандартрив кьадайбур я. Гьавада гьерекат идара ийидай минарада виридалайни цIийи системаяр туькIуьрнава. Аэропортда парцин конвейерар, VİP залар, чIехи туьквенар, ресторанар ва инсанриз къуллугъдай маса карханаяр ава. 

   Исятда Зенгиланда ва Лачиндани вири дуьньядиз талукь тир аэропортар эцигзава. Абуру регион мадни вилик тухудай мумкинвилер гуда. 

   Мукьвал вахтара Фуьзули шегьерда гужалди чарадан чилер кьуниз талукьарнавай музей ва Мемориал комплекс эцигда, абурун патав лагьайтIа, Гъалибвилин парк кутада. Ругуд залдин музейда Къарабагъда лугьуз тежедай хьтин вагьшивилер авур эрмени чапхунчияр русвагьдай экспонатар кIватIда. Мемориал комплекс шегьердин юкьва, вад гектардин чилерал эцигда.