|  12(247) 2011      

Играми редакция! “Самурдин” кIвачи чил кьур сифте йикъар зи рикIел хъсандиз алама. 1992-йисуз чи журналистри лезги чIалал газет акъудиз гатIунайла за халкьдин адет тирвал “тIварцIел кIеви хьурай” лагьанай. Гила 20 йис алатайдалай кьулухъ за и гафар тикрар хъийизва. Белки агъсакъал хьиз зи гафар кутугда жал. ДекIени! Къуй “Самур” инлай къулухъни виш йис акъат хъувурай.
Авайвал лугьун хьи, 20 йисан къене чна газетдай гзаф чирвилер къачуна. Чаз лезгийрихъ гьихьтин зурба алимар, шаирар, генералар аватIа чир хьана. Юкьван виш йисарин чи къагьриманрикай гзаф маракьлу макъалаяр кIелна.
РикI шадардай кар ам я хьи, и йисара чна “Самурдин” куьмекдалди хайи чIал генани дериндай чирна. “Гафалаг” рубрикади иллаки чи чирвилер артухарзава. Газетдин чинра заз хуш къвезвай материалрик хуьрерикай гузвай макъалаярни акатзава. Хуьрерикай кхьидайла Къебеле районни рикIелай ракъурмир. Чи хуьрерихъни маракьлу тарихар ава. Кьилди лезги сихилрал атайлани квевай чи хуьрерай лап машгьур ксар жагъуриз жеда.
Са делил гъиз кIанзава. Исятда за чи сихилдин ирид архадин тар туькIуьрзава ва и гьакъиндай ктабни кхьиз-ва. Сихилдин кьиле авайди Казим буба я. Адан хтул тир Агъадиз 1900-йисуз Тифлисда бегвилин титул ганай ва урус пачагь Николая ам Ширвандин лезгийрин бегвиле тайинарнай. Къубадин ва КцIарин агьалийри адаз Ширвандин шагь лугьудай ва мугьманвилиз атайла гьакIни кьабулдай. Гьа и сихилдай тир Эфсер Шуькуьров философиядин илимрин доктор я ва ада алай вахтунда Москвада кIвалахзава. “Самурдин” кIвалахдарар Къебеледиз атайтIа, за абуруз ихьтин делилар жагъуриз куьмек гуда. Чна куь рехъ хуьзва.
Садай Агьмедов,
Къебеле район.

Редакциядай: Вичин 71 яшар хьанвай Садай Агьмедов Къебеледин нуфузлу агъсакъалрикай я. Яргъал йисара райондин кьилин товароведвиле кIвалахай ам са шумуд йис я пенсиядиз фена. С.Агьмедов пуд рушанни са гададин буба я. Рушари институтар акьалтIарнава. Редакциядин кIвалахдаррихъ галаз суьгьбетдин вахтунда агъсакъалди районда газет кхьиз тада лагьана гаф гана. И кьиляй адаз разивал къалурзава чна.