Хабарар  |  10(269) 2013      

   Алай йисан 9-октябрдиз Азербайжанда кьиле фейи сечкийра халкьди мад гъилера Илгьам Гьейдаран хва Алиев президентвиле хкяна. МСК-ди ачухарай сескидин нетижайрай аквазвайвал, республикадин агьалийрин лап чIехи паюни (84,54%) президентвилиз кандидат яз къалурнавай цIуд касдин арадай Илгьам Алиеваз сес гана. Коституциядин Судди ам президент тирди тестикьарна. 19-октябрдиз Милли Межлисда цIийи президентди кьин кьунин мярекат кьиле фена.

     Уьлкве пуд лагьай гъилера адал ихтибар авун дуьшуьшдин кар туш. Вири дуьнядиз сейли сиясатчи Гейдар Алиеван къенепатан ва къецепатан сиясат лайихлудаказ давамарзавай Илгьам Алиева республикадиз регьбервал гайи виликан йисара чIехи агалкьунар къазанмишна, Азербайжан кIвачел ахкьалдарна, ам региондин виридалайни гужлу уьлкведиз элкъуьрна.  Республика югъ-къандивай абад жезва, ина кьиле тухузвай эцигунри, кардик кутазвай цIийи карханайри рикI шадарзава. Абадвилер тек чIехи шегьерра ваъ, гьакIни районра, яргъал хуьрерани кьиле физва. Рекьер, муькъвер чIугвазва, мектебар эцигзава, медениятдин дараматар гуьнгуьна твазва.

    Гьа и крариз лайихлудаказ къимет гайи инсанри республикадихъ агъвазвай, адан таъсиб чIугвазвай Илгьам Алиеваз мад гъилера ихтибар авуна. Сечкийриз гуьзчивал авур гьам чкадин, гьамни къецепатан тешкилатрин векилри хиве кьурвал, сечкияр демократиядал бинелу яз, азаддаказ кьиле фена. Уьлкведин гележегдикай никбиндаказ фагьумзавай халкьди сечкийра генани мукьувай иштиракна, чпи муд кутунвай кас хкяна.

 “САМУР”